A’ tilleadh gu Achadh an t-Seagail
Bha na caurs aig teis-meadhan an dà cuid fàs agus fèin-aithne Ghlaschu. Bha an lìonra a’ ruith bhon Dail Mhòr san iar don Àrd-Ruigh is Uddingston san ear, agus bho Mhuileann-Gaidh sa cheann a tuath gu Baile Chlarc aig deas. Uile gu lèir bha Glasgow Corporation Tramways còrr is 100 mìle a dh’fhaid le còrr is 1,000 trama aig àirde a threise.
Chaidh an siostam a dhùnadh mu dheireadh mar thoradh air barrachd trafaig air na sràidean, togail sgeamaichean-taigheadais mòra taobh muigh a’ bhaile, dìth obair-chàraidh air an t-siostam fad bhliadhnaichean, agus àrdachadh air prìsean dealain nuair a chaidh na stèiseanan cumhachd aig comhairlean ionadail a ghabhail thairis leis an stàit.
Advertisement
Hide AdAdvertisement
Hide AdGed a bha planairean-baile agus Corporaid Ghlaschu toilichte cùl a chur ris na tramaichean ann an ainm adhartais, cha robh muinntir a’ bhaile uile air an aon ràmh. Air 4 Sultain 1962, nochd còrr is 100,000 duine a dh’aindeoin uisge trom gus soraidh slàn a leigeil le na seann shooglies air caismeachd nan tramaichean mu dheireadh tro shràidean Ghlaschu. Dh’fhàg call nan tramaichean beàrn mhòr an dà chuid ann an cridhe a’ bhaile agus anns an t-siostam chòmhdhail aige, agus ann am beachd mòran, tha a’ bheàrn sin fhathast gun lìonadh.
Tha cothroman ann, ge-tà, tramaichean à Glaschu fhaicinn an gnìomh ann an dà àite: Taigh-Tasgaidh Nàiseanta nan Tramaichean ann an Siorrachd Derby agus, nas fhaisg’ air an dachaigh, Taigh-Tasgaidh Summerlee ann an Coatbridge.
Gu 50mh ceann-bliadhna dùnadh an t-siostaim a chomharrachadh, tha latha sònraichte gu bhith air a chumail aig Summerlee air 4 Sultain le tursan-trama an-asgaidh air seann tramaichean à Glaschu ’s à Siorrachd Lannraig fad an latha gu 8f. Bidh leasanan dràibhidh trama ann cuideachd agus cothroman tadhal air seada nan tramaichean.
Tha saor-thoilich aig Summerlee air iomairt a thòiseachadh gus trama 1245, a tha ann an droch staid an-dràsta, a sgeadachadh, agus tha iad a’ sireadh daoine a chuidicheas le seo.
Bidh deireadh-sheachdain sònraichte air a chumail ann an Taigh-Tasgaidh Nàiseanta nan Tramaichean ann an Crich ann an Siorrachd Derby air 15/16 Sultain cuideachd a bhios a’ comharrachadh slighe-trama Ghlaschu, le còig tramaichean às a’ bhaile gu bhith a’ ruith.
Is e àm brònach a tha seo airson càirdean nan tramaichean an Alba, ach bidh deagh leisgeul ann barrachd thachartasan mar seo a chumail aon uair eile nuair a dh’fhosglas siostam-thramaichean ùr Dhùn Èideann mu dheireadh ann an 2014.