Tha Murray MacLeòid ag ràdh gu bheil cothrom ann taic àiteachais fhaighinn ceart
Chaidh gabhail gu foirmeil ri Bile a' Bhidhe Mhaith, ach cha bu chòir a bhith an dùil ri cus crathaidh.
Tha fhios gu bheil feum air dùsgadh às ùr a thaobh nan rud a tha sinn ag ithe – airson adhbharan slàinte, airson coinneachadh ri feumalachdan na h-àrainneachd agus airson a bhith nas lugha an urra ri biadh bho cheàrnaidhean air feadh an t-saoghail, rud aig am bi dà bhuannachd: a’ cuideachadh iadsan a tha a’ cruthachadh bidhe anns an dùthaich seo fhèin agus a’ geàrradh sìos air truailleadh carbon.
Advertisement
Hide AdAdvertisement
Hide AdChaidh atharraichean a chur air adhart airson na Bile Dimàirt – mar a bhith a’ deànamh cinnteach gum feum buidhnean phoblach 60% den bhiadh ann an òrdughan fhaighinn san rìoghachd seo fhèin, agus còir air biadh fhighe a-staigh dhan lagh – ach cha deach idir gabhail riutha.
Thuirt ministear nan cùisean dùthchail Màiri Gougeon nach robh anns a’ bhile seo ach “frèam” air an tig togail agus gun tig gnìomhan agus pròiseactan mionaideach a dhealbhadh às a dèidh.
Tha fhios gur e tàmailt a bhios ann dhaibh-san a bha an dòchas gur e ath-nuadhachadh a thigeadh le poileasaidh ùr bidhe.
Ach, tha cothrom nas fheàrr a’ tighinnr, agus san t-seadh sin, cha robh anns an deasbad Dimàirt ach beagan de bhlàthachadh.
Ann an 2024, cuiridh Alba an cùlaibh ri Poileasaidh Choitcheann an Aiteachais leis gun tig an t-aonta eadar-amail às dèidh Brexit gu crìch.
Tha e a’ ciallachadh sa Phàrlamaid an ath bhliadhna gun tig tòrr ùine a chaitheamh air Bile Aiteachais a dhearbhas ciamar a thig taic a thoirt do thuathanaich is croitearan san àm ri teachd.
Tha an siostam mar a tha e an-dràsta cianail fhèin duilich a thuigs' agus tòrr de dhiofar sheòrsaichean taice ri fhaighinn.
Ach, gu sìmplidh, tha iadsan aig a bheil an cothrom as fheàrr biadh àrach a’ faighinn a’ chuibhreinn as motha dhen mharaig, le taic a bharrachd an siud ‘s an seo airson gnìomhan co-cheangailte ris an àrainneachd.
Advertisement
Hide AdAdvertisement
Hide AdTha e ciallachadh dhan £600 millean a tha a’ dol gu tuathanas sa bhliadhna ann an Alba, gu bheil a’ mhòr chuid ann an làmhan na feadhna air an talamh as toraiche.
Chan eil dol às air nach bi barrachd cuideam ga chur air an àrainneachd a’ dol air adhart, ach tha cunnart ma thig crathadh bunaiteach gun toir e droch bhuaidh air na thathas ag àrach de bhiadh, rud a bhiodh na cheum mòr air ais.
Tha cliù aig obair àiteachais ann an Alba airson a bhith nas fheàrr dhan àrainneachd na iomadach àite eile agus an uimhir dheth a’ crochadh air beathaichean a bhiadhadh air feur, ach tha aithne ann gum feumar tòrr a bharrachd a dhèanamh.
Tha fìor chothrom ann an seo taic nas motha a thoirt dhaibh-san aig a bheil na duilgheadasan as motha – glè thric an dearbh fheadhainn aig a bheil dòighean obrach a tha math dhan àrainneachd – ach thig gu leòr a chuideam bhon fheadhainn mhòra a tha gam faicinn fhèin mar cnàmh-droma a’ ghnìomhachais.
Le obair àiteachais a’ dol air adhart air 80% de fhearann na h-Alba, a’ toirt cumadh air ar tìr agus a’ cur taic ri coimhearsnachdan dùthchail, tha e duilich smaoineachadh air càil a thàinig air beulaibh na Pàrlamaid a dh’fhaodas a bhith cudromach, no anns a bheil an uimhir de chunnartan a’ feitheamh.