Pólais air thoiseach san réis
Leis gu bheil dòighean cruinneachaidh figearan rud beag eadar-dhealaichte do gach ùghdarras ionadail, faodaidh cuid a sgoilearan a bhith air an cunntadh dà thuras ’s faodaidh diofar thoraidhean a bhith ann eadar mar a bha na ceisteachain air an lìonadh le luchd teagaisg sgoile, pàrantan neo a’ chlann fhéin. Ge-tà, thathas ag aideachadh gu bheil an gluasad san fharsaingeachd do Ghàidhlig a’ dol sìos.
Ged a tha na figearan son na Beurla Ghallda a’ sìor dhol am meud, le 4,610 ann an 2014, suas bho 1,585 ann an 2011, tha sàr-eòlaich a’ toirt rabhadh an aghaidh a bhith ro shòlasach mu’n deidhinn. Thuirt J Derrick McClure, Oilthigh Obar Dheathain: “Air a’ chiad shealladh se naidheachd bhrosnachail tha seo ach tha na h-àireamhan cho beag meanbh agus feumaidh Scots a bhith ann an staid èiginneach ma tha iad fìor. Chuirinn geall gu bheil fada bharrachd air sin ri fhaighinn ann an Obar Dheathain a-mhàin. Nan gabhadh tu ris gu bheil na figearan seo a’ sealltainn àrdachadh san ìre de spéis agus de dh’ùidh a tha ga toirt don teanga bhiodh fàilte romhpa ach tha slighe fhada ri dhol fhathast mus bi iad fiùs faisg air a bhith math gu leòr.”
Advertisement
Hide AdMhol Mgr McClure an obair aig iomadach buidheann, mar an Scots Language Centre agus an Association for Scottish Literary Studies, a tha air a bhith gu mór an sàs ann am brosnachadh na cànain cho math ri na “ceumannan nas cinntiche” a tha Riaghaltas na h-Alba air gabhail bho thàinig PNA gu cumhachd.
Thuirt Dave Thompson, BPA son an Eilein Sgitheanaich, Loch Abar agus Bhàideanaich, aig a bheil an dà chuid Gàidhlig agus Scots, “Ged a tha mi fìor thoilichte gu bheil àrdachadh ann an àireamh nan teaghlaichean a bhruidhneas Scots, se briseadh dùil a-cheart cho mór gu bheil na h-àireamhan Gàidhlig air a dhol sìos. Tha Riaghaltas na h-Alba air obair mhór a dhèanamh ann am brosnachadh ar cànanan dualchasach, mar a tha am fàs ann am foghlam na Gàidhlig a’ sealltainn. Tha móran ri dhèanamh fhathast, ach tha mi cinnteach gun téid àireamh luchd bruidhinn ar cànanan dualchasach an àird le gach ginealach ùr.”
Tha na suirbhidhean a’ nochdadh gur e Pólais a’ chiad chànan dachaigh an déidh na Beurla sa chuid as motha de roinnean, ged a tha prìomhachas aig Scots ann an Siorrachd Àir, Moireibh, Sealtainn agus Lannraig a-Deas. Tha a’ Ghàidhlig sa chiad àite an déidh na Beurla sna h-Eileanan Siar agus san treas àite sa Ghàidhealtachd.
Ged a tha Pólais a’ coimhead gu math làidir mar chànan dachaigh, tha pròiseactan son cleachdadh na Pólais fhathast a dhìth.Tha Violeta Ilendo ’na cathraiche air Fife Polish Education Trust. “Tha cuid den bhòrd riaghlaidh againn ann an Cathair Chaladaidh o phàrantachd Phólach nach eil comasach air a’ chànan a bhruidhinn. Bhiodh cuid ag atharrachadh nan ainmean dualchasach aca agus a’ feuchainn ri bhith Breatannach seach Pólach.
“Uaireannan tha againn ri mìneachadh do phàrantan gun a bhith bruidhinn Beurla fad an t-siubhail san dachaigh oir togaidh clann Beurla co-dhiù. Feumaidh pàrantan a thuigsinn nach eil clasaichean leotha fhéin gu leòr air son cànan ionnsachadh. Bha mi fhìn mar sin cuideachd nuair a bha a’ chlann agamsa beag. Ach se cànan bhòidheach a tha againn, feumaidh sinn sin a chur an céill don fheadhainn òga le bhith ga bruidhinn ’s ga cleachdadh san dachaigh.”
Tha leughadh aithnichte am measg nan dòighean a bhios pròiseactan foghlaim air feadh an t-saoghail a’ feuchainn ri cànan na dachaigh a bhrosnachadh. Thuirt John Storey aig Comhairle nan Leabhraichean: “Mar as motha de leughadh san dachaigh, sann as fheàrr. Tha e gu math deatamach nach smaoinich daoine òga gun e gnothach-sgoile a-mhàin a th’ ann an leughadh Gàidhlig. Cuidichidh leughadh air son tlachd ann an iomadh dòigh.”
Advertisement
Hide AdDo luchd planadh cànain, tha an ìre gu bheil cànain ga bruidhinn san dachaigh air aon de na comharraidhean as cudromaiche gu bheil cainnt àbhaisteach an teaghlaich fhathast a’ ruith bho ghinealach gu ginealach. Thuirt fear labhairt aig Bòrd na Gàidhlig: “Tha sinn mothachail air cho cudromach ’s a tha an dachaigh mar roinn leasachaidh, agus tha aithne ga toirt dha sin sa Phlana Cànain Nàiseanta Gàidhlig.”
Thathas an dùil gun tig air a’ Bhòrd aithris a leigeil air a’ chuspair fhathast.