Imlich do bhilean
Cha robh Gàidhlig aice ach cha robh teagasg ann an Gàidhlig air a cheadachadh co-dhiù.
An-diugh tha sgoiltean ann far am bi a’ chlann air an teagasg gu tur anns a’ chànain, agus tha Bunsgoil Ghàidhlig Inbhir Nis air sealltainn an t-adhartas a chaidh a dheanamh le bhith a’ foillseachadh leabhar de reasabaidhean ann an Gàidhlig.
Advertisement
Hide AdTha Kirsty Nic a’ Phiocair a’ teagasg clann aig ìre a ceithir ’s a còig. Smaoinich i gum biodh e feumail agus inntinneach don chloinn reasabaidhean a thaghadh, Gàidhlig a chur orra ’s an cur ann an leabhar a reiceadh iad gus airgead a thogail son ionad chloinne aig Ospadal an Ràthaig Mhòir. Chaidh ceud a reic gu sgiobalta ’s tha iad a’ feitheamh ris an ath chlò-bhualadh. Thàinig urrasachd bhon chompanaidh IT Fujitsu, CNAG, Comhairle nan Leabhraichean – agus ASDA, a bhios a’ reic nan leabhraichean.
Chan eil na reasabaidhean idir cho sìmplidh ri buntàta agus sgadan, neo gruth agus uachdar. Gheibhear, am measg nan 24, biadh annasach mar measgan musgain, toiteanan muice ann an criomagan arain, sconaichean le measain, agus brot peasrach.
Thuirt Ceit Dunbar, a tha ag obair aig àrd ìre aig Fujitsu (bha a mac Calum an sàs san leabhar), “Tha am pròiseact a’ leigeil leis a’ chloinn Gàidhlig a chleachdadh ann an diofar dhòighean. Is toigh leotha a bhith a’ blasad air na dheasaicheas iad. Is olc an còcaire nach imlich a mheur!”