Coimhearsnachd eileanach air a sgoltadh le muilnean-gaoithe
Bho chionn trì bliadhna, cha mhòr, tha Scottish Power Renewables air a bhith ag amas air achadh-mara mòr de mhuilnean-gaoithe a thogail sa mhuir an iar-dheas air an eilean. Ann am plana an luchd-leasachaidh tha làrach mu 361 km2, tè den fheadhainn as motha san Roinn Eòrpa, a chruinnicheas eadar 500 agus 1800 MW de chumhachd glan: gu leòr gus na feumalachdan aig 270,000 gu 1,000,000 taigh a shàsachadh. Agus chaidh dreuchdan ùra a ghealltainn do mhuinntir an eilein.
Ach tha am pròiseact air beagan de sgaradh adhbharachadh anns a’ choimhearsnachd. Tha Robert Trifle, 67, fada an aghaidh leasachadh mòr den t-seòrsa, gu h-àraidh nuair a bhios an t-achadh-mara cho mòr agus cho faisg air eilean a rùin – “ro mhòr, ro fhaisg”, sna faclan aige fhèin.
Advertisement
Hide AdGhluais Robert a Thiriodh ann an 2005 as dèidh dha bhith tighinn dhan eilean gach bliadhna fad fichead bliadhna, ’s tha e air son an t-eilean a ghlèidheadh mar a tha e. Thòisich e a’ bhuidheann “No Tiree Array” (NTA) gus dùbhlan a thoirt don phròiseact, ’s chunnaic mi na h-amasan aca air sanasan mòra fhad ’s a bha mi a’ gabhail cuairt timcheall.
Tha dragh aig Robert gun deanadh am pròiseact cron uabhasach air coltas na h-àrainneachd nàdarra, air beathaichean-mara na sgìre (mar an cearban-grèine), air eòin na mara (mar am muir-bhuachaille), air turasachd, air iasgach – fiùs air croitearachd ’s air an aimsir. Agus tha dragh eile aige – nach fhaigheadh muinntir an eilein cus buannachd ás a’ phròiseact.
A rèir Robert, bu chòir do na Tiristich gnìomhachas na turasachd a leasachadh an àite cumhachd ath-nuadhachail. Tha e cuideachd a’ moladh “Tiree” a bhrosnachadh mar “sàr-ainm” air son biadh na mara ’s feòil bhon eilean, a’ samhlachadh deagh ghnè do luchd-ceannaich air feadh an t-saoghail. Bha Robert agus buill na buidhne toilichte an uair a chaidh dàil bliadhna a chur anns a’ phròiseact aig deireadh 2012.
Bidh iad an dòchas gur e samhla a th’ ann nach faicear na muilnean-gaoithe seo idir. Ach tha fear air an eilean mar-thà, nach eil ’na chùis chonnspaideach, agus a tha a’ toirt buannachdan don choimhearsnachd gun teagamh sam bith. Sann le Urras Choimhearsnachd Thiriodh, a thòisich ann an 2006, a tha e, ’s e air a ruith le Tiree Renewable Energy Ltd fo smachd an Urrais. Gheibh pròiseactan ionadail na coimhearsnachd airgead maoineachaidh le prothaid sam bith a nì an iomairt seo.
A bharrachd air a’ mhuileann-gaoithe, tha an t-Urras air buannachd mhath thoirt don choimhearsnachd le bhith brosnachadh ceangal èifeachdach luath ris an eadar-lìon. An-diugh, as dèidh ceithir bliadhna, seo fear de na sgeamaichean ionadail eadar-lìn as motha ’s as soirbheachail ann an Alba. Fianais gu bheil e comasach leasachadh a nì diofar a dhèanamh gun aimhreit gun ùpraid. Se tìde a dh’innseas dè cho furasta ’s a bhitheas e an aon rud a dhèanamh ann an Tiriodh a-rithist san àm ri teachd.