Cuirm mar chèilidh taighe, cuirm ann an talla mhòr

Bha Gaelic Song Circle aig Club Ealain Ghlaschu gu math tlachdmhor. ’S iad Noraidh MacÌomhair, Alasdair MacIlleBhàin agus Gillebrìde MacIlleMhaoil a bha a’ gabhail pàirt. O’n a bha an luchd-èisteachd uile ’nan suidhe aig bùird ann an talla car beag, bha e caran coltach ri cèilidh taighe, gu h-àraid o’n a bha na seinneadairean cho faisg. Bha an talla fìor mhath dha na guthan aca. Sheinn agus chluichd Noraidh deagh mheasgachadh de dh’òrain anns an dòigh phearsanta aige fhèin, a bhios a’ còrdadh ri mòran. ’Nam measg bha Càrlabhagh, An Eala Bhàn, Mo Chailin Dìleas Donn agus A Rìbhinn, a bheil Cuimhn’ Agad. Dh’innis e sgeul no dhà a bha glè èibhinn, cuideachd.

Se deagh thoiseach-tòiseachaidh dhan chuirm a bh’ ann.

An dèidh sin chualas Alasdair MacIlleBhàin á Muile. Tha guth fìor mhath aige, ’s bha an ceòl-taic o Ross MacUilleim agus Ailean Nairn fìor iomchaidh dhan t-seinn. Thagh e òrain ás a’ Mhorbhairne ’s á Muile agus sheinn e a dhà a rinn e fhèin. Tha sàr thàlant aige, agus ’s iongantach mura cluinnear mòran dheth anns na bliadhnaichean ri teachd.

Thagh Gillebrìde òrain on CD ùr aige Air Fòrladh, le taic o luchd-ciùil ealanta a bha còmhla ris ga chlàradh – Mhairi Hall, Eòghainn Mac a’ Phearsain agus Dìordaire Mhoireasdan. Bha an ìre a cheart cho math ris an CD nuair chualas na h-òrain air an àrd-làr.

Nochd fear eile le ceangal làidir ri Uibhist a-Deas anns a’ talla mhòr aig GRCH feasgar Di-Màirt – am pìobaire ainmeil Fred Moireasdan, a bha a’ cluichd ceòl on CD aige Outlands, a tha a’ dèanamh cheangal ri ceòl Bluegrass. Chan eil teagamh ann nach e Fred aon den luchd-ciùil as cruthachaile a bhios a’ cluichd ceòl dualchais an Alba aig an dearbh àm, a bharrachd air a bhith air leth comasach air cluichd air iomadh seòrsa pìoba ’s fìdeig. Bha e follaiseach nach robh an luchd-èisteachd ag iarraidh a leigeil far an àrd-làir.

Bha an leth eile ri tighinn ge-tà, ’s an sin chualas triùir a b’ àbhaist a bhith sa chòmhlan Planxty – Dónal Lunny, Andy Irvine agus Liam O’ Flynn, leis am fìdhlear Paddy Glackin cuide riutha. Bha a’ chluichd ’s an t-seinn dìreach sònraichte, ’s bha tuigse mhìorbhaileach eadar an luchd-ciùil. Se cuirm air leth math a bh’ ann o thoiseach gu deireadh.