Leasan ealain ás na Hearadh

By Raghnall Macilledhuibh, Leabhraichean ÙrA
Published on Saturday 21 January 2012 01:49

THA Two Views of Harris: Na Hearadh bho Dhà Shealladh le Lesley agus Alisdair Wiseman (Acair, £15) ’na leabhar brèagha aig am bi tarraing air leth do gach duine aig a bheil buntanas sam bith ris na Hearadh.

Air gach duilleig dheis tha dealbh mór dathte, air gach duilleig chlì tha pàirt dhen aon dealbh còmhla ri iomradh Beurla agus Gàidhlig ann an litrichean caibideil.

Tha stoidhle an dà Wiseman eadar-dhealaichte agus se amas an leabhair an coimeas ri chéile. Bidh Alisdair a’ glacadh na chì an t-sùil fhosgailte, a’ cleachdadh peansail agus dathan-uisge còmhla. Bidh Lesley a’ peantadh air sìoda agus a’ glacadh an t-solais ’s nan dathan a chì an t-sùil leth-dhùinte. Ann an dòigh ma-tà tha an leabhar ’na leasan ealain, a’ sealltainn mar a tha na h-aon tràighean, na h-aon chreagan ’s an aon mhuir a’ toirt dealbhan riochdail agus abstract gu bith.

Ormsa tha Alasdair a’ toirt smaointean air daoine, Lesley air Dia. Seo mar eisimpleir na choilean an dithist air là ann a Hùisinis: Alisdair air an làimh chlì, Lesley air an làimh dheis. Tha Lesley ag ràdh: “Chunnaic sinn na h-aon seallaidhean, na sùlairean san adhar, agus flùraichean na machrach a’ briseadh troimhe, le soirbheas beag laghach gar cuartachadh. Tha ar dòigh air sin a chur an cèill glè eadar-dhealaichte, ach le cumantas eatarra an dèidh sin.”

Chan eil ach aon ghearain agam: tha an sgrìobhadh clò-bhuailte air dathan làidire, a’ Bheurla ann an geal ach a’ Ghàidhlig ann an dubh; mar sin tha a’ Bheurla nas fhasa a leughadh na a’ Ghàidhlig.

Logged in as:

Comment here. Start typing your comment here:

Post comment

Please adhere to our Community guidelines

Your view

Please sign in to be able to comment on this story.