Tuathanas mòr gaoithe air fàire

By TORMOD E DÒMHNALLACH
Published on 15/09/2012 00:00

Gheibh foidhidinn furtachd. Co-dhiù se sin a chanas iadsan aig a bheil sealbh air fearann air Urras Steòrnabhaigh.

Ann an 2004 chaidh iarrtas a-steach air son cead tuathanas anns am biodh 42 roth-uidheim a thogail air talamh le croitearan air Oighreachd Steòrnabhaigh. Anns a’ bhad thàinig gearan bho Chomann Dìon nan Eun gun deanadh e cron air na h-iolairean. Chuir mòran air feadh na dùthcha a tha fo iomagain mu mhilleadh na h-àrainneachd an taic ris a’ ghearan. Chuireadh an t-iarrtas air ais ’s air adhart gus mu dheireadh, ann an 2010, an deach plana eile, le àireamh nan crann air ìsleachadh gu 36, a chur mu choinneamh Pàrlamaid na h-Alba.

An dèidh deasbad a lean fad bliadhna gu leth tha cead foirmeil air tighinn mu dheireadh an dèidh ochd bliadhna de chonnspaid, agus se sin naidheachd ris an deanar gàirdeachas.

Gheibh suas ri 200 neach anns na h-eileanan agus còrr agus 150 air feadh na dùthcha obair an lùib togail nan crann. Tha dùil gun tèid an togail aig Airinis.

Thuirt am BPA Alasdair Allan, “Se cothrom mìorbhaileach a tha an-seo gus obraichean a bhrosnachadh anns na h-Eileanan an-Iar.

“Feumar a-nis càball a chuireas an cumhachd gu tir-mòr a chur fon Chuan Sgìth.”