Tha fearg ag éirigh mu chosgaisean lìbhrigidh pharsailean

Published on Saturday 28 January 2012 00:00

THA 3,000 duine feargach eile air freagairtean a chur chun na suirbhidh aig Citizens’ Advice Scotland air cosgaisean lìbhrigidh pharsailean ann an sgìrean “iomallach” na h-Alba.

Bidh cuid a chompanaidhean air-loidhne a’ tabhann liubhairt an-asgaidh ach a’ cur ris a’ phrìs aon uair ’s gu bheil cod-puist a’ chustamair aca. Bidh cuid a’ cleachdadh sheirbheisean cosgail liubhairt ged a tha am Mèile Rìoghail a’ liubhairt air feadh na RA aig aon phrìs ìseal. Agus bidh cuid a’ diùltadh lìbhrigeadh gu sgìrean “iomallach” idir.

Thòisich oifis CAS Phort Rìgh a’ cruinneachadh fios as t-samhradh, ’s air 19 Dùbhlachd dh’fhoillsich oifis nàiseanta CAS a’ chiad aithris aca, anns a bheil 900 freagairt (www.cas.org.uk/resources/cas/migrated). Dh’ath-fhosgail iad an suirbhidh mìos eile, ’s nuair dhùin e ’n t-seachdain sa bha 2,200 freagairt eile aca – 3,100 uile gu léir.

Tha CAS ag iarraidh gun cum companaidhean air-loidhne ris an lagh (leithid le bhith a’ foillseachadh cosgaisean liubhairt aig bàrr na làraich aca), ’s gum bi cosgaisean liubhairt air an cumail cho ìseal ’s a ghabhas, stéidhte air na tha an companaidh a’ cosg orra an da-rìribh. Tha ministearan riaghaltais, pàrtaidhean poileataigeach agus comhairlean gu h-aon-ghuthach air an cùl.

Tha an suirbhidh dùinte a-nis (bidh an aithisg a-mach as t-earrach), ach tha CAS a’ cur fàilte air tuilleadh bheachdan agus fiosrachaidh tron làraich aca.

Am measg nan 2,200 freagairt ùr tha té bho dhuine sna h-Eileanan an-Iar a dh’òrdaich meatair beag son hòs a’ ghàraidh air 8 Faoilleach. Thuirt Amazon an toiseach gum biodh cosgais liubhairt £3.95 ann, ach nuair thug e seachad an seòladh aige, chaidh i suas gu £39.90. A réir làrach-lìn an fhactaraidh b’ i a’ chosgais-liubhairt £18; thionndaidh e a-mach gun robh Amazon ga dhùblachadh. Chan iongnadh ged a tha fearg air daoine.

Raghnall MacilleDhuibh

Logged in as:

Comment here. Start typing your comment here:

Post comment

Please adhere to our Community guidelines

Your view

Please sign in to be able to comment on this story.