Gun sìol gu leòr tuilleadh aig a’ ghealaig bhuachair

Published on 29/09/2012 00:00

Dh’fhalbh an speal ’s an t-inneal gearraidh a bha air a tharraing leis na h-eich, agus cha mhòr nach do dh’fhalbh na gealagan buachair (dealbh, deas).

Is toigh leis an eun bheag bhòidheach seo, aig a bheil gairm ghleadhrach, a bhith an lùib arbhair, oir sann air sìol a tha e beò.

B’ àbhaist don arbhar a bhith air a làimhseachadh ann an iomadach dòigh. Bha e air a cheangal, air a chur ann an suidheachain, ann an cocan agus an sin ann an cruachan mòra anns an iodhlann. Fhad ’s a bha an obair sin a’ dol, bha sìol a’ tuiteam air an talamh, agus bhiodh na gealagan buachair a’ sgròbadh, ’s iad air an dòigh.

Sguir na h-obraichean sin nuair a nochd an combine, an t-inneal-fogharaidh a bhios a’ sguabadh suas agus a’ slugadh sìos arbhar, feur, luibhean, daolagan, cuileagan agus an sìol air a bheil na gealagan buachair cho dèidheil.

Thuirt Jamie Boyle, manaidsear Comann Dìon nan Eun anns na h-Uibhistean, “Far am b’ àbhaist na ceudan a bhith, chan eil air fhàgail ach ceithir fichead de na h-eòin fhireann. Tha sinn a-nis a’ toirt grantaichean do chroitearan son gun cuir iad pìosan arbhair a bhios iad a’ gearradh ’s a’ cur don chruaich leis na seann mhodhan obrachaidh. A bharrachd air a-sin tha sinn a’ sgaoileadh sìol coirce ’s eòrna ann an àiteachan a bhios na gealagan buachair a’ cleachdadh.”

Tha sinn uile an dòchas gun tèid cho math leis an eun bheag seo ’s a chaidh leis an traon. Aig toiseach nan 90an cha robh air fhàgail anns na h-Eileanan an-Iar ach 250 de na h-eòin fhireann. Am-bliadhna chunntais iad còrr agus 500.

Tormod E Dòmhnallach