Gaelic: Caitheamh spitheagan

By TORMOD E DÒMHNALLACH
Published on 22/09/2012 00:00

THA cuimhne agam, agus gun na gillean ach òg, a bhith a’ dol dhachaigh air saor-làithean mus tàinig na drochaidean. B’ eudar dhuinn stad fad uair an uaireadair aig Baile a’ Chaolais a’ feitheamh ris an aiseag.

Chòrd sin ris na gillean oir bha iad glè an-fhoiseil agus iad fo ghlais ann an cùl càr beag. Bha latha geal grianach ann agus bha sinn uile, an còignear againn, mì-chofhartail.

Rinn na gillean air a’ chladach, a bha gu math creagach, agus thòisich iad air caitheamh clachan a-mach air a’ mhuir. Bha sinn ann an ciudha agus cha robh an gluasad ach mall, oir cha toireadh am bàt’-aiseag leatha ach sia càraichean.

Eadar gluasadan chaidh mi sìos agus sheall mi dhaibh mar a chaitheadh iad spitheagan. Is ann a thòisich iad air farpais, agus is iad a bha air an dòigh.

Cha chreid mi gun robh co-fharpais caitheamh spitheag aig na h-Olimpigean am-bliadhna, ach is dòcha gum bi an ath turas.

Bho chionn grunn bhliadhnachan tha co-fharpais caitheamh spitheag air a bhith air a cumail ann an Eilean Èisdeal. Thòisich e am measg nan eileanach a-mhàin, ach chaidh a cliù fad agus farsaing agus a-nis tha co-fharpais Caitheamh Spitheagan na Cruinne air a cumail ann an seann chuairidh sglèat air an eilean gach Sultain.

Bhuainnich Ailean Laycock, 19, a tha air a bhith a’ còmhnaidh air an eilean bho bha e aois trì bliadhna, a’ cho-fharpais grunn thursan. Thuirt e, “Tha iad a-nis a’ tighinn ’nan sruth agus an-uiridh chuir a’ cho-fharpais còrr agus sia mìle nota ris a’ choimhearsnachd bheag againn.”

Thèid a’ cho-fharpais air aghaidh Di-Dòmhnaich ged a bha an t-uachdaran, Jonathan Feigenbaum, a’ fiachainn ri bacadh a chur oirre.