Boinne ann am beul na gaoithe [e-mail]

Published on 15/09/2012 00:00

Chaidh tosgaire nan Stàitean Aonaichte a mharbhadh ann an Libia an uair a thugadh ionnsaigh air an ambasaid le gràisg dhaoine a bha feargach mu film Ameireaganach a rinn, ’nam beachd-san, dìmeas air Ioslam. Thugadh ionnsaigh air ambasaidean anns an Éipheit agus anns an Iemen cuideachd.

• Tha an cat-fiadhaich ann an Alba an impis dol á bith, agus eòlaichean ag ràdh gur dòcha nach bi gin ann fiùs an ceann grunnan mhìosan. Tha iad a’ beachdachadh air am beagan a tha air fhàgail dhiubh
ath-shuidheachadh ann an àite eile, is dòcha ann an Cataibh.

• Chaidh corp brùite a lorg air sràid ann an Lunnainn fo shlighe adhair Heathrow a dh’fhaodadh a bhith air tuiteam á pleun. Chuala coimhearsnaich brag mór madainn
Di-Dòmhnaich agus tha am poileas a’ feuchainn ri faighinn a-mach an robh an t-Afraganach am falach ann an té de na cuibhlichean laighe aig itealan. ■ Bhuannaich Andaidh Moireach Farpais Fhosgailte Teanas nan Stàitean Aonaichte, a’ chiad Albannach a rinn e a-riamh. Is esan cuideachd a’ chiad Albannach bho Harold Mahoney ann an 1896 a bhuannaich farpais Grand Slam.

• Thuirt an t-actair Emma Thompson gun tug an dreach Gàidhlig dhen leabhar ùr aice The Further Tale of Peter Rabbit (Grace Note Publications, £12.99) oirre smaoineachadh air Gàidhlig ionnsachadh.