Bail’ ùr gu bhith an Creag an Fhithich

Published on 30/06/2012 00:00

SE “Baile na Stàilinn” a chanas iad ri Tobar na Màthar agus na “Steelmen” ri sgioba ball-coise a’ bhaile. Is beag an t-iongnadh, oir aig aon àm bha barrachd stàilinn ga giollachd sa bhaile na ann an àit’ eile air an t-saoghal.

Anns an linn mu dheireadh, anns na tricheadan agus an sin ri àm a’ chogaidh, bha iarrtas air son stàilinn ag èirigh. Ann an 1954 dh’àithn an Riaghaltas an t-ionad stàilinn a bu mhotha anns an Roinn Eòrpa a thogail aig Ravenscraig. Tha an làrach – anns a bheil mìle agus ceud gu leth acair – eadar Tobar na Màthar agus Wishaw ’s a’ dol cho fada deas ri Carfin.

Anns na seasgadan bha sia mìle neach ag obair ann, agus uiread eile taobh a-muigh an làraich. Nuair a dh’fhosgladh iad na h-àmhainnean chuireadh e corraich air na mnathan anns na taighean mòr-thimcheall mar a laigheadh luath agus salchar air an nigheadaireachd aca.

Anns na seachdadan thòisich iarrtas son stàilinn air crìonadh, agus dhùin Ravenscraig ann an 1992. Bha an làrach air a thruailleadh le stuthan ceimigeach, agus thug e bliadhnachan agus mòran cosgais an talamh a ghlanadh.

A-nis tha Comhairle Lannraig a-Tuath air innse gun tèid £10 millean a chosg air rathaidean tron làraich. Togar taighean, oifisean, bùthan, colaiste agus ionad spòrs, agus bidh gach goireas ri fhaighinn ann am baile beag ùr Ravenscraig.

Tormod E DÒmhnallach